- మోడీపై రాహుల్‌ విమర్శ
న్యూఢిల్లీ : దేశంలోని నిరుద్యోగ యువతకు ఉపాధి కల్పించడంలో మోడీ ప్రభుత్వ వైఫల్యంపై కాంగ్రెస్‌ అధ్యక్షుడు రాహుల్‌గాంధీ శనివారం విమర్శలు గుప్పించారు. ప్రభుత్వ అసమర్థత, దివాలాతనానికి ఈ పరిస్థితి అద్దం పడుతుందని రాహుల్‌ ఫేస్‌బుక్‌ పోస్ట్‌ ద్వారా ఆరోపించారు. బీజేపీ ప్రభుత్వం ఉద్యోగాలు కల్పించలేకపోయిందని లక్షల పెట్టుబడి తరువాత తాను ఒక ఉద్యోగాన్ని పొందానని ఒక ఉబెర్‌ డ్రైవర్‌ వ్యాఖ్యానించినట్లు మీడియాలో వచ్చిన వార్తలను రాహుల్‌ ఈ సందర్భంగా ప్రస్తావించారు. ఓలా, ఉబెర్‌లు 20 లక్షల ఉద్యోగాలు కల్పించాయని నీతి అయోగ్‌ తన నివేదికలో వెల్లడించడంపై అడిగిన ప్రశ్నకు డ్రైవర్‌ పైవిధంగా సమాధానమిచ్చాడు. ఏడాదికి రెండు కోట్ల ఉద్యోగాలు ఇస్తామని ఎన్నికల సమయంలో ఇచ్చిన హామీలను మోడీ నెరవేర్చలేకపోయారన్నారు. గడిచిన 45 ఏండ్ల కాలంలో ఎన్నడూ లేనంతగా దేశంలో నిరుద్యోగిత రేటు పెరిగిందని నేషనల్‌ శాంపిల్‌ సర్వే ఆఫీస్‌(ఎన్‌ఎస్‌ఒ) వెల్లడించిన నివేదిక ఆధారంగా ఎన్‌డీఏ ప్రభుత్వంపై రాహుల్‌ తీవ్ర విమర్శలు గుప్పించారు. ఆ నివేదికను ఒక ప్రముఖ ఆంగ్ల పత్రిక ప్రచురించిన సంగతి తెలిసిందే. సర్వేను ఇంకా ఖరారు చేయలేదని ప్రభుత్వం వెల్లడించింది. గడిచిన 45 ఏండ్లలో 2017-2018 సంవత్సరంలో నమోదైన నిరుద్యోగిత రేటు 6.1 అత్యధికమని నివేదిక పేర్కొంది.
