రోజంతా చిరాకు, అలసి పోయినట్లు అనిపిస్తుందా..? ఆఫీసుతో ఒత్తిడి.. కుటుంబ సమస్యల గురించి ఎల్లప్పుడూ ఆలోచన.. ఆర్థిక సమస్యలు.. చెప్పుకుంటూ పోతే అన్నీ కష్టాలే. దీని ఫలితం రాత్రికి తగినంత నిద్ర ఉండదు. పిల్లల నుండి వద్ధుల వరకు దాదాపు ప్రతి ఒక్కరిలో ఈ సమస్య కనిపిస్తుంది. ప్రపంచ జనాభాలో 45 శాతం మంది నిద్ర లేమితో బాధపడుతున్నారు. నిద్రలేమికి కారణం మన దైనందిన జీవితం. సాంకేతిక పరిజ్ఞాన పురోగతి మనకు మేలు కంటే కీడే ఎక్కువ చేస్తుంది. ఇది మన సమయాన్ని మొత్తం అయస్కాంతంలా లాగేస్తున్నది. నిద్ర లేకపోవడం వల్ల అనేక ఆరోగ్య సమస్యలు తలెత్తుతున్నాయి. స్థూలకాయం, దష్టి లోపం, రోగనిరోధక శక్తి కోల్పోవడం, గుండె జబ్బులు, మధుమేహం వంటి తీవ్రమైన అనారోగ్యాలకు దారితీస్తుంది. కాబట్టి రాత్రి పడుకునే ముందు కొన్ని విషయాలు గుర్తుంచుకోండి.
ొ నిపుణులు, పరిశోధనల సూచన ప్రకారం చిన్న పిల్లలకు 8-9 గంటల నిద్ర అవసరం. పెద్దలకు రాత్రి 7-8 గంటల నిద్ర అవసరం. అప్పుడే మెదడు చురుకుగా పనిచేస్తుంది. శరీరం కూడా మంచి ఆరోగ్యంతో ఉంటుంది. రాత్రి పడుకునే ముందు కాఫీ తాగే అలవాటు మీకు ఉందా..? అలా అయితే దాన్ని వెంటనే మానేయండి. అది తాగిన తర్వాత శరీరంలో ఆరు గంటల దాకా దాని ప్రభావం ఉంటుంది. కాబట్టి ఎటువంటి కెఫిన్‌ పానీయాలు తాగవద్దు. మధ్యాహ్నం ఐదు తర్వాత తీసుకోకపోవడమే మంచిది. దానికి బదులు కొద్దిగా గ్రీన్‌ టీ తీసుకోవచ్చు.
- అధునాతన సాంకేతిక పరిజ్ఞానం రాత్రి నిద్రను నిరోధించింది. ఒంటరితనం నుండి బయటపడటానికి చాలా మంది తమ స్మార్ట్‌ఫోన్‌ను బెస్ట్‌ ఫ్రెండ్‌గా చేసుకున్నారు. నిద్రపోయే ముందు చాలామంది తమ మొబైల్‌ ఫోన్‌ను గంటల తరబడి చూస్తున్నారు. ఇది అనేక అనర్థాలకు దారి తీస్తుంది. మొబైల్‌ స్క్రీన్‌ ప్రకాశవంతమైన కాంతి మీ కండ్లను కూడా దెబ్బతీస్తుంది. కాబట్టి మీరు పడుకునే ముందు కనీసం ఒక గంట ఫోన్‌ను మీ నుండి దూరంగా ఉంచడం అలవాటు చేసుకుంటే మంచిది.
- రోజూ వ్యాయామం చేయడం ఆరోగ్యానికి చాలా మంచిది. అయితే, మీరు నిద్రపోయే ముందు ఎక్కువసేపు యోగా వ్యాయామాలు చేస్తే, నిద్రకు భంగం కలుగుతుంది. దీర్ఘకాలిక యోగా వ్యాయామాలు శరీర ఉష్ణోగ్రత, హదయనాళ పనితీరును పెంచుతాయి. చాలా మందికి రాత్రి భోజనం తర్వాత వ్యాయామం చేసే అలవాటు ఉంటుంది. ఈ సందర్భంలో మీరు వ్యాయామానికి ప్రత్యామ్నాయంగా పాటలు వినడం లేదా తేలికపాటి వ్యాయామం చేయవచ్చు.
- రాత్రి తినకుండా నిద్రపోవడం అంత మంచిది కాదు.. కానీ ఎక్కువ ఆహారం తినడం మంచిది కాదు. పరిమితంగా తినడం ఉత్తమం. పడుకునే ముందు ఎక్కువ తినడం వల్ల జీర్ణ సమస్యలు వస్తాయి. అటువంటి వారిలో చక్కెర స్థాయి అసమతుల్యమవుతుంది.
