రామం స్కూలు అయిపోగానే ఇంటికి వస్తున్నాడు. దారిలో ఓ బ్యాగ్‌ కంటపడింది. అది తీసుకొని విప్పి చూశాడు. బ్యాగ్‌ నిండా నోట్ల కట్టలు. తన కళ్లను తానే నమ్మలేకపోయాడు. ఎవరో పోగొట్టుకున్నారు. చుట్టూ చూశాడు. ఎవరిదారిన వారు వెళుతున్నారు. ఇంటికి వెళ్లి తల్లిదండ్రులకు చెప్పాడు. వారు కుమారుని వెంట బెట్టుకుని పోలీసు స్టేషన్‌కు వెళ్లారు. ''సార్‌ ఈ బ్యాగు మా అబ్బాయికి దొరికింది. ఇందులో డబ్బుంది. పోగొట్టుకున్న వాళ్లకు అందించండి'' అన్నాడు రామం తండ్రి. ఎస్సై ఆ బ్యాగ్‌ విప్పి పరిశీలనగా చూశాడు. ఓ చోట చీటి కనిపించింది. అందులో వ్యక్తి చిరునామా, ఫోన్‌ నెంబర్‌ ఉన్నాయి. వెంటనే నెంబర్‌కు ఫోన్‌ చేశారు ఎస్సై. ఫోన్‌ అందుకున్న వ్యక్తి 'మాది పక్క ఊరని ఆటోలో నుంచి బ్యాగ్‌ జారిపోవడం గమనించలేదని' చెప్పాడు. వెంటనే వచ్చి బ్యాగ్‌ తీసుకువెళ్లాలి అని చెప్పాడు ఎస్సై.
మరుసటి రోజు ఓ ముసలాయన పోలీస్‌ స్టేషన్‌కు వచ్చి బ్యాగ్‌ తీసుకున్నాడు. ''ఈ బ్యాగ్‌ తెచ్చిన కుర్రవానికి రూ. 500 ఇవ్వండి నా బహుమానంగా'' అని ఎస్సైకి చెప్పివెళ్లాడు. ఎస్సై ఆ కుర్రాడు చదువుతున్న స్కూలుకు వెళ్లి హెడ్‌ మాస్టర్‌తో మాట్లాడి ఐదువందలు ఇచ్చి వచ్చాడు. ఆ రోజు ప్రేయర్‌లో హెడ్‌ మాస్టర్‌ మాట్లాడుతూ ''పిల్లలూ మీరందరూ నీతి, నిజాయితీ కలిగి ఉండాలి. మన నిజాయితే మనకు మంచి పేరును సంపాదిస్తుంది. డబ్బుపెట్టి కొనలేని పేరు నిజాయితీకి వస్తుంది అని చెప్పి.. మన పాఠశాలలో చదువుకున్న రామం తనకు దొరికిన డబ్బు తల్లిదండ్రులతో చర్చించి పోలీస్‌ స్టేషన్‌లో నిజాయితీగా అప్పగించాడు. ఆ నిజాయితీకి బహుమానంగా ఆ వ్యక్తి ఐదు వందలు బహుమతిగా ఇచ్చారు. రామంను, వారి తల్లిదండ్రులను అభినందిస్తున్నాను. మన పాఠశాలకు మంచి పేరు తీసుకువచ్చిన రామం నిజాయితీకి నా వంతు ప్రోత్సాహకంగా రూ. 116 ఇస్తున్నా అని ప్రకటించాడు... కరతాళ ధ్వనులతో ఆ స్కూలు ప్రాంగణం అంతా మోగింది.
రామం నిజాయితీకి దక్కిన ఫలితం అది. పిల్లలూ మీరు కూడా నిజాయితీ అలవర్చుకుంటారు కదూ!
- కనుమ ఎల్లారెడ్డి,
9391523027