హైదరాబాద్: మనుషుల్లో మానవత్వం నశిస్తోంది. చిన్న చిన్న విషయాలకే ఒకరితో ఒకరు గొడవపడి ఏకంగా చంపుకునే వరకు వెళుతున్నారు. తాజాగా ఇలాంటి ఘటన ఒకటి చత్తీస్‌గఢ్‌లోని బిలాస్‌పూర్ జిల్లాలో చోటు చేసుకుంది. ఫోన్ ఇవ్వలేదనే కోపంతో ఓ కూతురు ఏకంగా తన తండ్రిని కొట్టి చంపిన ఘటన గురించి వింటే ఎవరైనా షాక్ అవ్వాల్సిందే. వివరాల్లోకి వెళితే.. బిలాస్‌పూర్‌ జిల్లాలోని కంచన్‌పూర్ గ్రామంలో రామ్ ధనుహర్ భార్యతో కలిసి ఉంటున్నారు. ఈ నెల 23న ఆయన కూతురు సరస్వతిని ఆమె భర్త ధనుహర్ ఇంట్లో వదిలివెళ్లాడు. ఆ మరుసటి రోజు తన ఫోన్ గురించి వెతికిన సరస్వతి తన తండ్రిని ఫోన్ గురించి అడిగింది. అయితే ముందు తనకు ఫోన్ గురించి తెలియదన్న ధనుహర్.. ఆ తరువాత ఆమె ఫోన్ తానే దాచిపెట్టానని అంగీకరించాడు.
            తన ఇష్టానికి వ్యతిరేకంగా పెళ్లి చేసుకున్నందన.. ఆమెకు ఫోన్ ఇవ్వనని చెప్పాడు. దీంతో ఆగ్రహించిన కూతురు సరస్వతి.. ఫోన్ ఇవ్వాలని తండ్రిని చితకబాదింది. ఈ క్రమంలో ధనుహర్ చనిపోయాడు. దీంతో ఇంటి సమీపంలోనే అతడి శవాన్ని పాతిపెట్టారు. అయితే ఈ విస్తుగొలిపే ఘటనలో కూతురు సరస్వతికి ఆమె తల్లి కూడా సహకరించడం గమనార్హం. అనంతరం తల్లీకూతుళ్లు ఇల్లు వదిలి పారిపోయారు. అయితే ఈ ఘటన గురించి తెలుసుకున్న ఇరుగు పొరుగు వాళ్లు.. పోలీసులకు ఫిర్యాదు చేశారు. రంగంలోకి దిగిన పోలీసులు ధనుహర్‌ను హత్య చేసిన తల్లికూతుళ్లను అరెస్ట్ చేశారు. వారిపై పలు సెక్షన్ల కింద కేసులు నమోదు చేశారు. కేసును మరింత లోతుగా దర్యాప్తు చేస్తున్నారు.