ఇంద్రవెల్లి: ఆదిలాబాద్ జిల్లాలో ప్రతిష్టాత్మాకంగా నిర్వహించే నాగోబా జాతరను ఈ ఏడాది రద్దు చేస్తున్నట్లు మెస్రం వంశీయులు తీర్మానం చేశారు. శుక్రవారం ఉమ్మడి జిల్లాలోని మెస్రం వంశీయులు నాగోబా ఆలయం(మురాడి)లో కెస్లాపూర్‌లో ఫిబ్రవరి 11 నుంచి 18 వరకు నిర్వహించే నాగోబా జాతర పై చర్చించారు. కోవిడ్-19 నేపథ్యంలో ఈ ఏడాది జాతరను రద్దు చేయాలని మెస్రం వంశీయులు తీర్మానించారు. ఈ సందర్భంగా మెస్రం వంశీయుల పీఠాధిపతి వెంకట్‌రావ్‌పటేల్‌, పెద్దలు చిన్నుపటేల్‌ తీర్మాన వివరాలు వెల్లడించారు. అయితే కొవిడ్‌-19 నేపథ్యంలో కేవలం మెస్రం వంశీయుల సంప్రదాయ పూజలు, కార్యక్రమాలు యథావిధిగా కొనసాగుతాయని చెప్పారు. నాగోబాకు మెస్రం వంశీయులు నిర్వహించే మహాపూజలతోపాటు రోజువారీ కార్యక్రమాలు ఉంటాయని స్పష్టం చేశారు. జాతరతోపాటు ప్రజా దర్బార్‌ను కూడా రద్దు చేస్తున్నట్టు వెల్లడించారు.
