హైదరాబాద్ : వికారాబాద్ జిల్లాలో కుటుంబ కలహాలతో ఓ తల్లి ముగ్గురు పిల్లలతో సహా చెరువులోకి దూకింది. ఈ దారుణమైన సంఘటన కొడంగల్ మండలం హస్నాబాద్‌లో జరిగింది. నారాయణపేట జిల్లా మద్దూరు మండలం కొమ్మూరుకు చెందిన ఎల్లమ్మ తన ముగ్గురు పిల్లలైన రాజు, రజిత, అనితతో కలిసి హుస్నాబాద్ చెరువు వద్దకు వచ్చి చెరువులో దూకింది. పిల్లలకు చున్నీతో కట్టి చెరువులో పడేసింది. ఆ తర్వాత ఎల్లమ్మ కూడా చెరువులో దూకింది. అయితే ఆ పిల్లల్లో అనిత అనే అమ్మాయి ఎలాగోలా తప్పించుకుని బయటపడింది. కానీ ఎల్లమ్మ, రాజు, రజిత ముగ్గురు చెరువులో మునిగి మృతిచెందారు. అభం శుభం తెలియని పిల్లలు చనిపోవడంతో ఈ సంఘటన చుట్టుపక్కల ప్రాంతాల వారిని తీవ్రంగా కలచివేసింది. కేసు నమోదు చేసిన పోలీసులు దర్యాప్తు చేస్తున్నారు.
