హైదరాబాద్ : బుర్ఖా ధరించిన ఓ మహిళ తుపాకీతో హల్ చల్ చేసింది. ఓ షాపు యజమానిని బండ బూతులు తిడుతూ తుపాకితో గాల్లోకి కాల్పులు జరిపింది. ఈ సంఘటన ఈశాన్య ఢిల్లీలోని చౌహాన్‌ బంగ్రా ప్రాంతంలో ఈ నెల 18న చోటు చేసుకుంది. పోలీసులు ఆమెను అరెస్ట్ చేశారు. ఇక సదరు యువతిని జఫ్రబాద్‌కు చెందిన నుస్రత్‌గా గుర్తించారు. నుస్రత్‌కి, ఓ షాపు యజమానికి మధ్య మొబైల్‌ ఫోన్‌కు సంబంధించి వివాదం తలెత్తింది. అప్పటికే మద్యం సేవించి ఉన్న నుస్రత్‌ షాపు యజమానిని అసభ్యకరంగా తిడుతూ.. గన్‌తో బెదిరించడమే కాక అతని షాపు బయట కాల్పులు కూడా జరిపింది. అంతేకాక తాను గ్యాంగ్‌స్టర్‌ నసీర్‌ సోదరినని తెలిపింది. మహిళ చర్యలతో అక్కడ ఉన్న ప్రజలు భయభ్రాంతులకు గురయ్యారు. దీంతో పోలీసులు ఆమె మీద కేసు నమోదు చేసి అరెస్ట్ చేశారు. ప్రస్తుతం ఈ ఘటనకు సంబందించిన వీడియో సోషల్ మీడియాలో వైరల్ గా మారింది.
